علق الفنان بيومي فؤاد على الخلاف بينه وبين الفنان محمد سلام، واعتذر عن الفيديو الخاص به الذي تسبب في الأزمة.

فال "فؤاد" عبر بودكاست "شقة التعاون" مع حسام داغر: "في الفيديو بتاعي أنا غلطت، الناس مالهاش غير الظاهر، بالنسبة لهم أنا واحد طالع بابيع صاحبي.. أنا لما بشوف الفيديو قدامي بقرف".

تابع أنه تجمعه علاقة قوية بمحمد سلام امتدت لسنوات طويلة، قائلا: "أملي في ربنا كبير، ربنا يصلح الحال".

اختتم موجها رسالة لمحمد سلام، وبدى عليه التأثر: "أقوله نفسي اشوفلك حاجة في رمضان السنة دي، ربنا يوفقك، وأنا عارف معدنك، ربنا يعدي المسألة دي على خير، وأنت تعلم مين بيومي فؤاد كويس، ولو زعلان مني يا ابني، أنا آسف".

حكاية أزمة بيومي فؤاد ومحمد سلام:

في أكتوبر 2023، اعتذر محمد سلام عن المشاركة في مسرحية «زواج اصطناعي»، ضمن فعاليات موسم الرياض.

وقال «سلام» في مقطع فيديو: «أنا مش متخيل إن أنا هروح أعمل مسرحية وأهزر وأغني وأرقص وأخواتنا في فلسطين عمالين يتقتلوا ويتدبحوا ومفيش حاجة بتحصلهم. أنا مش هقدر أسافر طبعًا».

أضاف: «كنت على أمل إن الموسم يتلغي أو يتأجل زي ما حصل في مهرجان الجونة والقاهرة. أو إن الموضوع يهدى في فلسطين في غزة ونقدر نعرض. بس دلوقتي لو عملت كدا هكون زي اللي بقتلهم».

في المقابل، وبعد انتهاء عرض المسرحية، هاجم «بيومي» زميله على خشبة المسرح، وقال: «من حقك تعتذر عن المسرحية، بس مش من حقك إنك تغلط في فنك، إحنا مابنجيش علشان نضحك حضراتكم، إحنا بنقدم فن، فن مصري، وأنتم بتحترمونا وإحنا بنحترمكم جدًا».

أردف: «شيء عظيم إن الفنان يكون له جمهور في كل الدول، شيء عظيم إني أتصور مع شاب سعودي، وأتصور مع سيدة سعودية وهي تعلم إني مصري، أنا بشرَّف بلدي، وهنا هحاول أخفف على رجل أنقذ موقفا وكان رجل قدها اسمه محمد أنور (الذي حل بديلا لمحمد سلام وتعرض لانتقادات لاذعة)».

وختم: «أنا فنان مصري ولي الشرف، جيت المملكة العربية السعودية ولي الشرف، كتر خيركم، إحنا بنتعب ونشقى علشان نقدم فن، ولو الموضوع كده، يبقي فيه فنانين من أيام نجيب الريحاني لحد محمد أنور المفروض ينتحروا، إحنا بنقدم فن».