أيام "الهبل الجميل" مع مصطفى قمر ومحي وفؤاد
Thursday, February 25, 2016 - 17:44
كتب:
اخواني وأخواتي.. أبناء الثمانينات والتسعينات أعتذر لكم وأعترف لكم إن: إحنا اتضحك علينا!
تعالوا نسمع تاني اليومين دول كلمات الأغاني اللي كنا نندمج معها ونحبها ونرقص على ايقاعها،.. تعالوا ندقق فيها شوية لنتعرف على كم الهبل اللي عشنا فيه الوهم مع كلمات أغاني الزمن الجميل ..ده إذا كان فيه كلمات أساساً:
أغنية أعاتبك على ايه "محمد محي":
اعاتبك على ايه ؟واللا ايه ؟ واللا ايه ؟ واللا ايه ؟ (اذكر كام وللاايه وردت في الأغني)
ع الويل واللا الجراح واللا عمري اللي راح واللا على نن عيني اللي انت قسيت عليه (ازاي هتقسى على نني عينه بس؟)
ليلي يا ابو الليالي ياليل ياليلي يا ليل عيني يا ابو السهارى يا عين يا عيني يا عيني (اذكر كام ليل وكام عين وردت في الأغنية تاني)
أغنية "هتمرد ع الوضع الحالي" عمرو دياب :
كداب القلب اللي يساوم ويغالط احساسه الواهم دلوقتي خدعتي وبقى فاهم ولا عنتش اصدق في خيالي (احنا معظمنا طبعا كنا بنسمعها كدا "كداب القلب اللي يسااا ويغالط احساسواااااه"، عمرو دياب بياكل الميم)
أغنية يا دانا دانا "عمرو دياب":
الأغنية كلها عبارة عن الجملة دي "يا دانا دانا يا نادانا يا دانا دانا يانادانا ترتارتارتاراراراااا" احنا اكيد اتعلمنا حاجة من الأغنية بس لسه مش عارفة أحط ايدي عليها، ومش مهم خالص تذكر كام دانا في الأغنية لأنهم كتيييييير ..)
أغنية محمد فؤاد "معقول":
معقول لا مش معقول (هو طبعا بيفوق نفسه وكده) واياك تاني تخاف أو اشوفك خواف (ايش هدا والله نفس المعنى)
"لولاكي" علي حميدة:
"لولاكي لولا لولا لولا .. لولاكي لولا لولا لولا لولاكي ماحبيت" هو ده بس الكوبليه اللي كنا بنغنيه غالبا ولا نعرف حاجة بعدها ..
أغنية "يااني" محمد فؤاد:
أول 53 ثانية في الاغنية عبارة عن "يااااااااني ياني ياني ياني وياااااااااااااااااني ياني ياني ياني وياني ياني وياني ياني ياني ياني وياني ياني ياني ياني ياني ياني ياني ياني وياني ياني ياني ياني" اتعلمنا فيها الصبر الحمد لله..
أغنية "طبّلي" محمد فؤاد:
طبلى طبل على طبلى خليك حنين طبطبلي وأنا كنت بسمعها كدا"داب طبلى" وصاحبتي لسه مصلحهالي (مش محتاجة أقول انها علمتنا الرقص ع الطبلة)
أغنية "مرمرينا" محمد فؤاد:
مرمر مرمر مرمرينا مرمر مرمر اؤمرينا مرمر مرمر كلمينا مرمر مرمر صدقينا (خلاص يعني البلد كلها مافيهاش غير مرمر مافيش سامية مافيش لميا ولا سارة ولا أسماء مثلاً)
أغنية "في السكة" محمد فؤاد:
في السكه في السكه في السكه في السكه في السكه في السكه هاههاهه .. هاههاهه هوهوهو..هووو ها ها ها ... هاهاها في السكه شفت اتنين ماشيين مع بعضهم ماتقولش رايحين فين سيبهم مع بعضهم وسلمو سلمو ماسلمو ماسلمو (ودي بتعلمنا انه من تدخل فيما لا يعنيه سمع ما لا يرضيه)
أغنية "جلجلي" حميد الشاعري:
جلجلي جلجلة صهللي صهلله .. اجمعي واطرحي واسرحي واقسمي وافرحي وامرحي ( اتعلمنا الجمع والطرح والقسمة)
"داري رموشك" علاء عبد الخالق :
داري رموشك عني وداري داري داري (التكرار سيد الموقف يا جماعة)
أغنية خالد عجاج "شكا حكا شكا بكا":
شكا حكا بكا .. شكا حكا شكا بكا شكا حكا بكا (احنا هنا بنتعلم التركيز وازاي تطلع جملة مفيدة من الكلام ده)
أغنية "ولا واحد ولا مية" حكيم:
ولا واحد ولا مية ولا ألف وتلتمية ولا كل الدنيا ديا ولا ولا مليون (مش عارفة اشمعنى الف وتلتمية بالذات كان ممكن تبقى ألف وخمسمية ونفس الوزن يعني عادي)
مصطفى قمر "هاصدق عيونك لو":
هاصدق عيونك لو تخلي القمر يحلو .. فتحتي العيون ع الشوق سقيتي الهوا للجو ( لحد النهادرة مش عارفة هي ازاي سقت الهوا للجو)
أغنية "كلمة بحبك" محمد فؤاد :
يا رب كل اثنين على الحب حبايب قربهم ومتبعدهمش،كل جيران واصحاب وقرايب جمعهم متفرقهمش،واللى تعبان فى الليالى، ليله قصره .. (كان أسهل يدعيلهم في صلاته بدل مايعمل أغنية ويكلف نفسه ... سجدتين والله وبعدهم أغنية أمين أمين يارب العالمين لمحمد فؤاد برضه وخلاص)
وللأغاني بقية ...
التعليقات