قبل أن تعدموه.. اعرفوا أولًا.. ليه ماسلمش عليه ؟!
Submitted by kareem.saeed on Sun, 08/14/2016 - 00:40
الذين يهاجمون لاعب الجودو المصري الذي رفض مصافحة اللاعب الاسرائيلي عليهم ان يراجعوا موقفهم بعض الشيء، "اشمعنا يعني الولد الغلبان الملخوم ده اللي حنحاسبه".
ما تشوفوا هو نشأ فين و أتربى فين و على ايه! أتربي في دولة مصالحة اسرائيل على الورق ومخاصماها في الظلمة!! أتربى في بلد عندها سفير إسرائيلي في القاهرة وسفيرنا المصري في تل أبيب وبيكلموا بعض في الظلمة ومن ورا الستارة لكن اللي يتجرأ و يكلم إسرائيلي في العلن يبقي خاين لمصر و للقضية!!.
اللاعب الغلبان ده أتولد و اتفرج علي السفارة في العمارة وعلى صعيدي في الجامعة الامريكية اللي افتخرنا فيه بحرق العلم الاسرائيلي والكل بيصفق للي بيعمل كده و بيقولوا عليه بطل الأبطال!! الولد ده عايش في مجتمع وزير خارجيته ذهب لزيارة اسرائيل و قابل رئيس وزرائها في بيته اتفرج معه على ماتش بطولة أوروبا واحنا مش عارفين ده صح ولا غلط.
اللاعب الغلبان ده أتربى علي أغنية شعبان عبد الرحيم "انا بأكره اسرائيل" اللي ولعت مصر وفي نفس الأغنية "بحب عمرو موسى" لأنه كان علنا كوزير خارجية شبه مقاطع اسرائيل في حين انه كان بيروح بمنتهي "الاحترام" يتكلم و يتحاور ويتعشى معاهم كمان من وراء الستار لان ده شغله.
على كل حال انا كنت اتمني طبعا ان لاعب الجودو المصري يصافح اللاعب الاسرائيلي لان دي اخلاق الرياضة، لكن كونه ما عملش كده بلاش نحكم عليه بالإعدام لانه ما اتعلمش و لا شافش غير كده.
بلاش المعايير المزدوجة دي و خلينا نواجه نفسنا بالحقيقة و نعرف احنا مين وعاوزين ايه بالظبط ونتعلم من التجربة دي إن احنا نربي الأجيال القادمة على مبدأ واحد وطريق واحد بدل ازدواجية المعايير اللي تعبتنا كلنا، والله لو كان سلم عليه كنت هتلاقي اللي طالع يلومه و يقوله كان كفاية عليك تلاعبه.
في كل الأحوال باقول لا سلام هارد لك و إن شاء الله تكسبه المرة الجاية.
(من صفحة النائب د. أحمد سعيد)