علق عمرو أديب على أزمة ابتعاد شيرين عبد الوهاب عن الإعلام والأضواء، خاصة مع انتشار أخبار عن تدهور حالتها الصحية، مطالبًا المعنين بالتدخل لحل الأزمة، كي تعود شيرين مجددًا لجمهورها.

قال "أديب" خلال حلقة برنامج "الحكاية": "أنا معرفش مين ولا أعرف في إيه، أنا مش بوجه كلامي لشيرين، لكن لحد هو عارف يقدر يعمل إيه، معرفش هو مين وفي أي جهة وبيشتغل إيه، بس شيرين محتاجة حد يتدخل، ويعملها حاجة.. أغلبنا عارف تقريبًا إيه المشكلة، ويا نلحقها يا منلحقهاش".

أشار:"أنا بتكلم من واقع اتصالات حصلت النهارده.. وكل شوية حد يقولي قولنا نعمل إيه.. أنا مقدرش أعمل حاجة، وعاوز ألحق شيرين، معلش الكلام يضايق وممكن يضايق شيرين نفسها، بس أنا عاوز أطلع كداب، وتطلع شيرين زي الفل".

اختتم: "في ناس عارفة شيرين فين وحالتها عاملة إزاي.. دي حالة إنسانية انقذوها يا جماعة، حتى لو مش عاوزة".