في حياتنا العذاب أشكال وألوان، ولو مكنتش تعرف من العذاب غير اللون الاسود، احنا هنساعدك تعرف له ألوان مختلفة خصوصا كوبري أكتوبر في السطور التالية هتعرف ان عذابه بألوان قوس قزح وممكن تستمتع بيه كمان.

1-  صلة الرحم:
لو طلعت الكوبري بعد 11 صباحا، جهز لك قائمة بأهلك اللي الحياة شغلتك عنهم ، واتصل يا معلم بطنط منى هتلاقيها واقفة في المطبخ واستمتع معاها بقصة هنطبخ ايه النهارة ، أو ممكن تتصل بأنكل عبده وتسمع آخر أخبار مشاريعه الفاشلة، ولو ضغط عليك تشاركه زي كل مرة، اوعى تخلي الزحمة تزهقك فتوافق .

2-  فرصة للشقط:
وأكم من جوازات بدأت من على كوبري أكتوبر الناس بتتعرف الصبح وينزلوا على البيت يقرأوا فاتحة، طبعا فترة الانتظار كفيلة انك تتعرف على قصة حياة المزة اللي جنبك وتاخد قرار التدبيسة الأبدية كمان .

3- يا محلا الشات
أبليكشن الشات اللي منزله من ورا مراتك ومفيش وقت تكلم المزز اللي عليه، وقفتك على كوبري أكتوبر أفضل وقت تعمل فيه ده هتتشات وتاخد مواعيد ولو الابليكشن فيه gbs ممكن تقابل صاحبتك الجديدة كمان احتمال كبير تلاقيها جنبك أو وراك أو أمامك .

4-  ممارسة السادية
طبعا العفاريت كلها بتتنطط قدامك ما انت واقف يا عيني بالساعات، لا فكك منهم أنا قولت لك م الالوان هساعدك تعيش عذاب كوبري اكتوبر بألوان قوس قزح ، افتح بس انت ارقام اصحابك وقلب فيهم وسيب مساحة للشيطان اللي جواك يطلع ، واتصل بابراهيم فكره بصاحبته اللي شقطتها منه، أو كلم سيد ونكد عليه بتفاصيل ويد اند الساحل اللي مطلعهوش معاكوا .. إلخ ، ابدع انت بقى في أفكارك

5 – وقت النميمة
السواقة واكلة نص عمرك في البلد دي وزحمتها، بس مش هتلاقي أحلى من كوبري اكتوبر تمارسي عليه هوايتك المفضلة،  خصوصا من بعد ما تعدي الدقي في اتجاه رمسيس، الحتة دي واقفة دايما، اتصلي بصاحبتك دعاء "الصفرا" هتجيب لك أخبار الشلة وجيرانهم كمان، استمتعي انتي بوقتك ومتبطليش ضحك ولا نميمة .